Bizkaian salgaiak garraiatzeko errepideak erabiltzeagatik egindako ordainketaren bigarren fasea uztailaren 1ean hasiko da

Bigarren fasea A-8 eta BI-10, N-636 eta BI-30 errepideetara luzatuko du 2023an BI-625 eta N-240 errepideetan martxan jarri zen ordainpeko arku-sistema, kamioi handien zirkulazioa errepide horietan % 30 eta % 39, hurrenez hurren, murriztea lortu duena. Sistema Europar Batasunaren jasangarritasun- eta deskarbonizazio-helburuekin lerrokatuta dago, eta 3,5 tonatik gorako ibilgailu astun handiei eragiten die.

Bizkaian 3,5 tonatik gorako garraio astunek salgaiak garraiatzeko errepideak erabiltzeagatik egin behar duten ordainketa 2024ko uztailaren 1etik aurrera egongo da indarrean, errepide hauetan:

• A-8 Kantauriko autobidea eta BI-10 errepidea, Basurtutik (p.k. 119,500) Muskizko El Haya auzoraino (139,219 k.p.).

• N-240 errepidea, Tarragona - Bilbo (Barazar), Urgoitiko lotunetik (55,773 k.p.) eta Ubidea saihesbidetik (23,050 k.p.).

• N-636 errepidea, Beasain - Durango (Kanpazar) Gipuzkoarekin muga egiten duen tokitik (34,980 k.p.) Durangoraino (49,350 k.p.).

• BI-30 errepidea (lehengo N-637 errepidea) Gurutzeta-Erletxeta (Arrontegi), Gurutzeta (8,000 k.p.) eta Erletxetako lotunearen artean (28,180 k.p.).

• BI-625 errepidea, Laudiotik (372,560 k.p.) Basaurira (387,310 k.p.).

Horrela, lehen fasean N-240 eta BI-625 errepideetarako garatutako sistema aipatu berri diren bide guztietara zabalduko da 2024ko uztailaren 1etik aurrera.

Carlos Alzaga Azpiegituretarako eta Lurralde Garapenerako foru diputatuak azaldu duenez, Europar Batasunak ezartzen dituen deskarbonizazio-jarraibideekin bat datorren eredua da, eta 3,5 tonatik gorako kamioi handiak CO2 isurketak murriztera bultzatzen ditu, ibilbide luzeak saihestuz. Era berean, zeharka bada ere, sistema horri esker, zirkulazio astuna eskualdeko errepideetatik edukiera handiko korridore eta bide handietara bidera daiteke, eta ibilgailu astunak udalerrietako hiriguneetatik igarotzea murrizten da. "Lehen fasea martxan jarri zenetik, kamioi handien trafikoa nabarmen jaitsi da, eta % 30 murriztu da BI-625 errepidean eta % 39 N-240 errepidean. Ordainketa sistemak garraio-sare berdeagoa eta eraginkorragoa sustatzen du; milaka kamioi dira egunero, kasu askotan lehenago hiriguneak zeharkatu ohi zituztenak, eta horrek ingurumenean eta segurtasunean eragiten du", adierazi du Alzagak.

Salgaien errepidezko garraioaren sektoreari laguntzea

"Helburua salgaien errepidezko garraioa bermatzea da, jasangarria, eraginkorra eta ekonomikoki zein sozialki arduratsua izan dadin, eta sektorea bera aldaketaren eragile aktiboa izatê ziurtatu du diputatuak. Carlos Alzagak gogorarazi du Bizkaiko Foru Aldundiak salgaien garraioaren sektorearekin duen konpromisoari eusten diola, eta laguntza-plan bat eskaintzen duela, kamioien modernizazioa eta lehiakortasuna sustatzeko laguntza ekonomikoko neurriak eta deskontuak barne hartzen dituena. Horrela, 948 garraiolari erregistratuta daude deskontuak jasotzeko, eta 2023ko urtarriletik 2024ko maiatzera bitartean guztira 365,000 euro jaso zituzten.

Bestalde, Azpiegituretarako eta Lurralde Garapenerako Sailak eta Ekonomia Sustatzeko Sailak elkarlanean dihardute sektorea modernizatzeko programa sustatzen, segurtasunean, energia-eraginkortasunean eta ingurune digitaletara egokitzean hobekuntzak eginez kamioiak berritzen laguntzeko. Programa horrek aurten 200 eskaera baino gehiago ebatzi ditu, eta guztira 593.000 euroko dirulaguntzak eman ditu. Beraz, 1,5 milioi euroko hasierako aurrekontua agortu egingo dela aurreikusten da.