Erabiltzaileek 7,75eko kalifikazio orokorra eman diete Bizkaiko errepideei 2023an; garbiketa, seinaleztapena eta segurtasun-neurriak dira, aurten ere, ondoen baloratutako adierazleak.

Azpiegituretarako eta Lurralde Garapenerako Sailak Bizkaiko errepideen kalitatearen pertzepzioari buruz urtero egiten duen inkestaren arabera Bizkaiko errepideen foru-sareak erabiltzaileen balorazio altua izaten jarraitzen du. Oro har 10etik 7,75ekoa da balorazioa, eta aurten, berriz ere, garbitasuna (8,72), seinaleztapena (8,36) eta segurtasuna (8,18) nabarmentzen dira ondoen baloratutako adierazleen artean.

Azterlana lurraldeko gidariei egindako 3.000 inkesten bidez egin da eta errepideen egoerari eta egin beharreko hobekuntzei buruzko pertzepzioa ezagutzeko aukera ematen du, bai eta lurraldeko eskualdeetako proiektuei eta obrei buruzko balorazioa egiteko ere. Hala, inkestatuen % 26k soilik esan arren egunero edo ia egunero auto-ilarak pairatzen dituela, galdera hori da Bizkaiko errepideetan hobetu beharreko alderdiei buruzko erantzun espontaneo gisa gehien errepikatzen dena, Arrontegi, Avanzada eta Txorierri aipatuz.

Hegoaldeko Saihesbidearen eta AP-68 errepidearen arteko konexio berria

Hegoaldeko Saihesbidearen eta AP-68 errepideen arteko lotura 2023ko apirilean jarri zen martxan, eta 10etik 7,6 puntuko batez besteko balorazioa lortu du azterlanean. Balorazioa 8,51koa da Txorierriren kasuan eta 8,09koa Enkarterrin eta 7,97koa Ezkerraldean erantzun dutenen artean.

Beste alde batetik, Hegoaldeko Saihesbidearen balorazio orokorrak gora egiten jarraitzen du, eta 6,71 puntu izatetik 2023an 6,86 izatera igaro da. Adierazle zehatzei buruz galdetzean balorazioa batez bestekoa baino askoz handiagoa da, 10etik 8ra iristen baitira bidearen segurtasun, erosotasun eta azkartasunari dagokionez.

Bidesarea Plana

Lurraldeko eskualdeetan egin diren edo egingo diren jarduketen egokitasunari dagokionez honako hauek nabarmentzen dira ondoen baloratutakoen artean:

9,2 Kadaguako tunelen hobekuntza.

8,8 Gurutzetako Ospitaleko sarbideak Ezkerraldetik.

8,75 Gurutzetako korapiloaren laugarren erreia.

8,46 itsasadarreko bulebarra eta Erandio eta Barakaldo arteko All Iron zubia.

8,42 Santo Domingo errepideko Galbarriatuko bigarren erreia.

8,3 Irubiden N-634 errepidearen hobekuntza eta segurtasuna.

8,1 Erandion Makro inguruko hobekuntza eta segurtasuna.

Itsasadarraren azpiko tunela

Bizkaiko metropoli-inguruneko hurrengo urteetako jarduketa garrantzitsuenetako bat Artatza eta Ballonti lotuko dituen ibai-azpiko tunela da. Azpiegitura honek trafikoan duen beharrari eta izango duen eraginari buruzko balorazioa oso positiboa da, 7,89ko batez besteko balioespenarekin, eta Ezkerraldean bizi diren pertsonen artean 8,55era iristen da. Gainera % 82,8k uste du itsasadarraren azpiko tunelak Bizkaiko trafikoa arintzen lagunduko duela.

Bidesarien erabileraren joerak

Bidesariak erabiltzen dituztela baieztatzen duten gidarien ehunekoa 2,2 puntu igo da 2023an, % 48,5era arte. Eskualdeka Durangaldeak eta Lea Artibaik dute baiezko erantzun gehien: % 76,2 eta % 74,3, hurrenez hurren. AP-8a da gehien erabiltzen den bidea.